Inthlang rama awm kan ni a, kan aiawha thlanchhuahten kan ram leh khawtlang hruaiin, hunbi neiin rorelna fawng chelh hun kan siam thin.
Hei hi a tha a, democracy hlutna leh kan zalenna thiang taka kan hman theihna hun a nih bawk avangin kan khawsak phung nen pawh a inmil hle.
Hetih lai hian kan ram leh bial aiawha inthlanna hrang hrang kan neihah political party hrang hrangte inbeih luat vangin sum leng leh therhlo hrang hrang tawktarh a tam chho viau mai a, politician te thiam loh nge mipui lam tih pawh hriatthiam a har ta hle.
Inthlan hrang hrang hi kan la hmachhawn zel dawn a, nimin lawka LADC inthlanah te khan an huamchhung bik a zim na vang vangin kan thudawnna hrang hrang chuan sum lengvak a tam hle niin an sawi hlawm. Hei hi engtia tihreh chi nge kan ngaihtuah a ngai ta a ni.
Kum thar kan kai anga, AMC inthlante, inthlan hrang hrang kan hmachhawn chho leh dawn. Hengah te hian kan rilru sukthlek leh kan ngaihtuahna hi thianghlim tak ni tura tanlak a va tul em. Politician leh mipuite inkar hrang hrang hi kan chinfel vat a hun ta viau. Chuti a nih loh chuan kan inthlanna hrang hrang hi a tawp ru chho viau ang tih a hlauhawm ta hle mai.