Aizawl: Aizawl khawpuiin kawlphetha tha zawk a neih theihna tur leh tun aia hmasawnna neih a nih theihna tura thawhhona tha zawk neih dan turte sawi hovin Nilaini khan Aizawl veng hrang hrang local council aiawhte leh P&E Department hotute an thukhawm.
Thutkhawmah hian kawlphetha chungchanga thil pawimawh, mipuite hnena hriattir zung zung dan tur te, mipuite hnena power supply tha zawka pek a nih theih nana line leh transformer-te dahna hmun tur ruahman chungchang te, electric bana a hrui inthlung hnawk lutuk tihfai leh a hnawk lehzel tur ven kawnga hmalak hona turte an rel a.
Hei bakah, mipui him zawk nana electric ban leh line hnai lutuka in sak leh electric hrui fual lutuk awm loh nana hmalak te, power supply bo thlau – power pawh ruk, spark nasa, chhun lama street light eng leh tul lova power tihek thei thil dangte ven kawnga hmalak ho dan turte an sawi ho va, Krismas leh kumthar hunpui lo thleng tur atana inbuatsaihna chungchangte an sawi ho bawk.
Engineer-in-Chief, P&E Department Conference Hall, Kawlphetha Building Rooftop-a thutkhawm hi Er. Lalrinmawia, SE Aizawl Power Circle in a kaihhruai a. Aizawl City Local Council Association President C. Lalbiaknunga chuan inhmuhkhawmna hun tha an nei thei chu lawmawm a tih thu a sawi a. Mipuite mamawh kawlphetha pek chhuah kawngah P&E thawhpui turin Local Council tinte chu an inrin reng thu a sawi.
Thutkhawmah hian Aizawl veng tin Local Council atangin member pahnih (Chairman/(Electric in-charge)/Secreatary) te leh P&E department atangin Aizawl khawpui chhung enkawltute EE (Distribution Division), EE (Revenue Division), EE (Generation Division) te bakah SDO leh JE-te an tel a ni.