Mizoram Board of School Education (MBSE) in nimina HSLC Examination, 2026 result a tihchhuahah a pum puia mark 480 hmutu, Rachael Biakthapari, St. Joseph Higher Secondary School chu pakhatna nia hriat a ni.

MBSE Chairman JH Zoremthanga sawi danin ram puma pakhatna hian mark 480 a hmu a, nikuma pakhatna aiin mark khatin a hmu tam zawk a. MBSE chuan kalphung thar hmangin tun exam result an tihchhuah atang hian mipui hmuh theih turin result bu-ah top 10 hming tar lan a ni tawh lo va, zirlaite division pawh tar lan a ni tawh lo bawk.

Tun tumah hian zirlai 18,257 an exam a, heng zinga 14,665 chu pass-in, pass percentage hi 80.31 a ni a. Kum kalta, 2025 pass percentage 76.68 aiin a tha zawk.

Subject malah Social Science-ah fail an tam ber a, zirlai 3,258 an fail a, Mizo-ah fail tlem berin fail 469 an awm.

Candidate zawng zawngte pass vekna sikul 146 awmin fail vekna sikul 13 a awm bawk.

Tun tumah hian sikul pass kim 146 an awm a, pass awm miah lohna sikul 13 an awm a. Sikul hminga exam zingah mipa 8,298 an awm a, hmeichhia hi 9,665 an awm thung a, private-ah hian mipa exam 150 an awm a, hmeichhia 144 an awm a. Mipa hi 6,776 an pass a, pass percentage hi 81.66 a ni a, hmeichhia 7,741 an pass a, pass percentage hi 80.09 a ni.

District ang zawngin Aizawl district an titha ber a, 89.60% an pass a, Serchhip-in dawtin 89.51% an pass a, ti tha pathumna district chu Kolasib niin 84.13% an pass.

Lawngtlai district chu tichhe ber niin 61.49% an pass a, Saitual chuan dawtin 62.21% an pass a, Lunglei district pass percentage chu 65.80% a ni.

High school enkawl dan hrang hrangah deficit school an ti tha ber a, pass percentage 96.92 a ni a, private school-te 89% an pass a, lumpsum school-te 77.47% an pass a, aided school-te 72.66%, government school-te 72.07% a ni a, private candidate-te pass percentage hi 49.66 a ni.

Top 10 tar lan loh chhan naupangte nawrna nasa tihtlem nan

MBSE Chairman JH Zoremthanga chuan HSLC result bua top 10 an tar loh chhan CBSE leh CISCE bakah board lian deuhte kalphung a nih bakah, naupangteah result tha nei tura innawrna nasa thin lutuk tihtlem an duh vangte a nih thu a sawi.

Ningania MBSE-in HSLC result an tihchhuah hnua a pisaah thu thar thehdarhtuten an kawmnaah MBSE chairman chuan kumin hian exam zawhnate chu LOTS atangin zaa 60 siam a ni a, a bak zaa 40 chu application leh HOTS atanga siam a ni bawk tih a sawi.

Result bu-ah Top 10 an tarlan loh chhan sawiin JH Zoremthanga chuan, “CBSE leh CISCE bakah Board lian deute kalphung a ni. Hei hi NEP 2020 in kaihruaina a siam credit system leh grading system kalpui tur a hmalak lawkna a ni a. Hei bakah hian board exam result atan chauha zirlai zir lawk vak vak ang kha awm lo se kan duh ber a. Naupangteah result tha nei tura innawrna nasa thin lutuk tih tlem kan duh bawk a. Zirna sang zawk an zir dawnin, HSLC Top 10 an nihna leh an pass na division ni lovin NEET, JEE leh CUET-ah te entrance exam result zel an en tawh avangin chutiang atan chuan thiamna tak tak nei zawk se kan duh,” a ti.

MBSE Chairman chuan zirna in hma a sawn zel theih nan question pattern tihdanglam zel tum a ni tih sawi bawkin, kumina compartment 117 te chuan admission an tlai lohna turin compartment exam buatsaih thuai an tum thu a sawi a. HSLC result complaint hun chu ni sarih chhung hawn a ni dawn a, improvement pawh kuminah vek exam theih a ni dawn tih a sawi bawk.