Aizawl: April 25 hi khawvel puma sikserh dona ni ‘World Malaria Day’ a ni a. He ni hi a hranpaa hman ni lo mah se, district hrang hrangah sikserh dona atana hmalakna hrang hrang kalpui a ni.
Mizoramah sikserh natna a la hluar hle a. Tun dinhmunah India ramah mi 1,000 zel atanga sikserh vei hmuhchhuah zat (Annual Parasite Incidence-API) atanga chhutin sikserh tamna ber state nihna Mizoramin a la hlauh mek a. Mizoram-ah kum 2024 khan sikserh vei mi 16,899 awmin, mi pasarih an thi a. Kum 2025-ah sikserh natna vei mi 9,328 an awm a, mi parukin an thihpui a. Kumin March thla thleng sikserh hmuhchhuah tawh zat hi 666 niin, thihpui an la awm lo a ni.
Kum 2024-ah India rama sikserh vei hmuhchhuah zat chu mi 2,55,500 niin, mi 86-in an thihpui a. Kum 2025-ah sikserh vei 2,33,555 hmuhchhuah niin, thihpui mi 55 an awm bawk.
India ramah hian India hmarchhak state te bakah Andhra Pradesh, Chhattisgarh, Gujarat, Karnataka, Madhya Pradesh, Maharastra, Odisha, Tamil Nadu, Uttar Pradesh leh West Bengal te hi sikserh tamna hmun a ni.