Aizawl: Mizoram Police-in sorkar thuchhuah lem siamtu Lalramhlua, Upper Republic veng an man.
April 27, 2026-a General Administration Department-in ruah sur nasat avanga sorkar chawlh a puanna ni awm tak office memorandum lem pakhat chu social media platform hrang hrangah thehdarh a ni a, hei hian mipuite tan buaina nasa tak a chawk chhuak a ni.
Document-ah hian Irene Zohlimpuii Chongthu, Additional Secretary, GAD hming chuangin Ch. Lalnunkima, Deputy Secretary, GAD-in digital signature-in a sign hnan angin a lang a ni.
Hemi chungchangah hian Christina Lalmuanzuali, Under Secretary, General Administration Department, Aizawl District chuan Cyber Crime Police Station-ah dan anga hma la tura ngenin FIR a theh lut a. A ngenna angin CCPS Case No. 17/26 dt 27.04.2026 u/s 336(3)/353(1)(b) BNS 2023 chu ziah luh nghal niin chhui nghal a ni.
Document lem siamtu hi darkar 24 liam hmain chhui chhuah a ni a. April ni 28, 2026 khan he sorkar thuchhuah lem siama vawrh darhtu, Lalramhlua (kum 18), s/o Michael Lalramchhana, Upper Republic, Aizawl chu man nghal a ni.
Mizoram Police chuan sorkar document siam danglam emaw, siam chawp leh theh darh hi dan kalh tlat a ni tih an sawi a. Hetiang thil lakah hian mipuite fimkhur hle turin an chah a. Lo inhnamhnawih te chungah dan anga na taka hma lak zel a ni dawn tih an sawi.
Mizoram Police chuan mipuite chu social media (Facebook, Instagram, Whatsapp etc) hmanga an thil thawn darhah fimkhur lehzual turin leh thudik finfiah hmasa thin turin a ngen bawk.