Aizawl: Aizawl Mihlun Thlante’n nawrna nasa tak avanga State University tur Aizawl atanga Lungleia sawn chu pawi an tih thu an sawi.
Thawhlehnia an thuchhuahah Aizawl Mihlun Thlahte chuan, Mizoram Assembly Session-ah lungrual taka Mizoram State University Bill pass a ni chu lawmawm an ti a. Chutih lai mekin, nghakhlel taka State University Act chu a taka a chan hun an thlir laiin hun lo kal zelah a awmna tur headquarters chu Aizawl atanga Lungleia sawn a lo ni ta dawrh mai hi pawi an tih thu sawiin, “Hei hi nawrna nasa tak avanga sorkar pawhin a thutlukna a sawhsawn nia lang hi pawi kan ti lehzual a ni,” an ti.
Aizawl Mihlun Thlahte chuan Aizawl hi mi tin ta, state khawpui ber leh mi tam berin an pan khawm a nih avanga zirna sang inpui pawh a awmna hmun awm tak niah an ngaih thu an sawi a. State capital hmasawnna chu hmun dang atanga er emaw, ep emaw chiah an ngai lo tih an sawi.
Kum 2024-2025 report-a a lan danin, Mizoram college hrang hranga zirlai awm zat hi 18,935 an ni a. Pachhunga University College (MZU ta) tel lovin Aizawl khawpui huamchhunga zirlai awm zat hi 11,289 a ni a. Hnahthial atanga Lunglei chhim lam area-ah hian zirlai 2,289 chauh an awm a. Zirlai tam dan atanga chhut ringawt pawh hian Aizawla Mizoram State University a awm hi a phu hle thu an sawi bawk.
Aizawla College awmsa ho changtlung tawh tak tak te behchhanin, sorkar hian sum tam lutuk seng lova State University din thei tura an ngaih laia, a thamral ta mai hi pawi an tih thu sawiin Aizawl Mihlun Thlahte chuan, Mizoram State University din tur hian zirlai tam zawk hmakhua en chungin Mizoram sorkar hian hma la se an duh thu pawh Chief Minister hnenah lehkha an theh luh tawh thu an sawi a. Tun hnuah chuan eng issue-ah pawh ni se, political pressure duhawm lo avanga thutlukna liantham tihdanglam leh thin hi thleng tawh lo se an duh thu an tar lang bawk.