Aizawl: Mizoram Board of School Education (MBSE)-in High School Leaving Certificate (HSLC) Examination 2026 result a tichhuah taka Mizo zirlai ti tha top 10 chawimawina hun Thawhlehni khan Vana Pa Hall-ah Mizo Zirlai Pawl (MZP)-in an buatsaih.
Mizo zirlai ti tha chawimawina hun hi Education Minister Dr. Vanlalthlana chuan khuallian niin a hman pui a. Thusawiin, zirlai an nih chhunga an hlawhtlinna chan chhan chu an nu leh pa, zirtirtute leh khawtlang hruaitute tawngtaisakna a ni tih hria a, an tana theihtawp lo chhuah tute an hriat reng a ngai a, an hriat loh ni la lain an tlahiam dawn tih a sawi.
Khuallian chuan textbook piah lam an thiam a ngaih thu leh by-heart system a kal lo va, an thiamna tak tak paw chhuak thei tura zir turin a fuih a, question pattern a danglam chho zel dawn tih sawiin, chumi mil chuan an inher rem chhoh ve zel a ngai dawn a, an thiamna tak tak lan theihna tur question an buatsaih chho zel dawn tih a sawi.
MZP President Dr. C. Lalremruata pawhin thusawiin, Mizoram sorkarin kumin atangin result bu-ah ranking leh division te tarlan tawhloh nise tih chu MZP chuan Mizo zirlaite zingah inelna thianghlim a awm theihna atan tar lan ngei nise an duh tih sawiin, “Mi thenkhatten MZP-in kum tina an lo tih thin top 10 chawimawi theih loh dawn avanga duh lo anga min ngaihna hi thu dik lo a ni,” tiin, Mizo zirlaite zingah inelna thianghlim zawk a awm theih nan kum lo la kal leh zel turah pawh result bu-a Top 10 leh division tar lang ngei turin sorkar an ngen nawn leh tih a sawi.
MZP chuan zirna kawnga hma an sawn theih nan question pattern leh exam system bakah an syllabus te siamthain, midang te el pha ve tura hmalakna hi zirna kawnga hma an sawnna atan chuan hmalakna hmasa turah an ngaih thu MZP President hian a sawi bawk.
Mizo zirlai an chawimawite hi kumin HSLC result chhuakah Top 10-ah hian Mizo 18 an lang a ni.