Aizawl: Disaster Management & Rehabilitation Department leh Buannel Geo Solutions & Services te tangkawpin an buatsaih, Disaster Incident & Reporting Management System ‘Khuarel App’ chu nimin khan DM&R Department Minister Prof. Lalnilawma chuan a tlangzarh.
Secretariat Conference Hall No. 1, MINECO-ah ‘Khuarel App’ tlangzarh inkhawmah Prof. Lalnilawma chuan khuarel chhiatna a lo thlen thulha DM&R leh State & District Disaster Management Authority (SDMA& DDMA) ten rang taka chanchin an puan chhuah zung zung theihna leh chhiatna lam thil record data felfai taka dah that theihna tur duanchhuah a ni chu lawmawm a tih thu sawiin, Mizoram tan thil chhinchhiah tlak tak a nih thu a sawi.
Minister Prof Lalnilawma chuan Mizoram chu India hmarchhak state zinga hetiang app changkang tak nei hmasa ber an nih thu a sawi a. Mizoram mipuite chu he Khuarel App hman awlsam leh tangkai tak hi download-a hmang tangkaitu nih tum theuh turin a chah bawk.
Tlangzarh inkhawmah hian Udit Prakash Rai, Commissioner & Secretary, DM&R chuan Khuarel App hi mipuiin khuarel chhiatna thleng report chu DM&R department leh DDMA te an hriattir zung zung theih bakah, DM&R Department leh DDMA lam atang pawhin khuarel chhiatna chungchanga mipui hriat tur pawimawhte chu an puang darh zung zung thei tawh dawn tih a sawi.