School Education Minister Dr Vanlalthlana chuan MBSE buatsaih, HSSLC Examination 2026 result chu lawmawm a tih thu a sawi.
Nilainia a pisa-ah thuchah sawiin Dr Vanlalthlana chuan HSSLC 2026 result chhuakah zirlai exam hmachhawn mi 12,243 atanga za zela 87.67 laiin hlawhtlinna an chang thei leh kum hmasa aia pass percentage zaa 6.57 laia a sang chu lawmawm a tih thu a sawi.
Minister chuan kumin result chhuakah sorkar school atanga zirlai pass zat chu stream hrang hrangah zaa 80 chung lam an ni thei vek tih sawiin, “Kum hmasa lama result neih dan han thlirin zirlai pass percentage zaa 80 an la pel ngai lo va, kuminah erawh stream tinah an pel vek,” a ti a. Sorkar sikula zirtirtute leh zirlaite taimakna a lo lang chu a lawmawm a tih thu leh a chhuan thu a sawi a. Candidate zawng zawng pass vekna sikul neitu zirtirtute leh zirlaite pawh a lawmpui thu a sawi bawk.
Dr Vanlalthlana chuan zirlai hlawhtlinna chang thar zawng zawngte thinlung taka a lawmpui thu leh zirna sang zawk an zir chhohnaah hlawhtlinna an chan zel theih nan duhsakna sang ber a hlan thu sawiin, “Zirna kawngpui pengthuam atanga kal darh a lo ngai dawn ta a. Mi rilru puitlingte chu he hunah hian an danglamna a lo lang thin a. Kawng zawh tur thlan kawngah te leh dam chhunga hnathawh tur thlan kawngah te hun pawimawh a ni. Mahni kawng zawh tur theuhah hlawhtlinna paw chhuak thei turin tan lak a ngai hle dawn a ni,” a ti.
Tun tuma hlawhtling rih lote chu beidawng mai lova nasa zawka tan la sauh sauh tur leh chhungkua leh ram tana hlawhtlinna sual chhuak turin anmahniah theihna duhawm tak a awm tih hre reng turin a chah bawk.
Minister chuan Mizoramah zirna tha a awm theih nan sorkar leh mipuite lungrual taka an tanho a ngai tih sawiin, nu leh pate chu an fate zirna ngaihsak deuh deuh tur leh Mizoram tana mi chhenfakawm chher chhuak tura theihtawp chhuah turin a sawm a ni.