Aizawl: Mizorama ran vulhtuten an ran vulhte a thih palh pawha sum an hmuh let theihna tura Mizoram sorkarin National Insurance Company (NIC) thawhpuia ‘Livestock Insurance Scheme’ a kalpui mekah Mizoram pumah vawk 667 ziah luh a ni tawh.
Aizawl district-ah vawk 371 ziah luh niin, insurance ti tam ber an ni a, Hnahthial district-ah 99 insurance tihfel a ni tawh a, Hnahthial district chu Mizoram district-ah insurance titam ber dawt tu a ni mek a ni.
District Veterinary Officer Dr. C. Sanghluna sawi danin Livestock Insurance-ah hian vawk, bawng, sial, kel leh beram te tih theih ni mah se, tun dinhmunah Hnahthial district-ah chuan vawk bak insurance a la awm lo niin a sawi.
Vawk insurance-te hi khuarel chhiatna leh hri avanga an thih chuan a len dan azirin Rs 7,200 atanga Rs 24,000 thleng hmuh let theih a nih tur thu inremnaah chuan tar lan a ni.
Vawk bikah hian vawk vulhtute hian Rs 248 chauh an chawi a, hemi bakah hian certificate man Rs 50 chawi a ngai.
Mizoram hmun thenkhatah African Swine Fever leng a awm mek a, hri leng puanna hmunah chuan insurance hi kalpui theih a ni lo va, Hnahthial-ah erawh ASF a la len ve rih loh avangin vawk vulhtute chu insurance tihtheih hun laia ti theuh tura an duhpui thu a sawi bawk.