President Donald Trump-a’n US Navy hmanga Strait of Hormuz hawn tuma hma a lak thar laiin Iran chuan he tuikawnga lawng eng emaw zat a kap a, UAE tuialhthei phur lawngchawlhna a kang bawk a, chawlhkar li kalta atanga inkahhai puan a nih hnua indona nasat leh ber a thleng leh mek.
Trump-a mission thar, ‘Project Freedom’ hi a hma zan, Pathianni zan khan social media-ah puangin khawvela energy phurhna kawng pawimawh pakhata lawng tangte chhuahtir tumna a ni a, hemi atan hian lawng sipai chakna hman a tum.
Hetih lai hian Thawhtanni khan strait kaltlangin sumdawng lawng a kal lo va, Iran atangin tharum thawhna lantir a ni thung a, hun rei tak atang tawha vauna an tawh chuan an thenawm ramte beih thar a tumna a tilang.
US sipaite chuan US sumdawng lawng pahnihin strait an paltlang tih an sawi a, engtikah nge an paltlang tih erawh an sawi lo va, Iran chuan kaltlang an awm lo tih a sawi ve thung.
He biala US sipai commander chuan a lawng rualten Iranian lawng tenau paruk an tichhia tih a sawi a, Iran chuan a hnial a. Admiral Brad Cooper-a chuan Iranian sipaite chu he mission kalpui mektu US sipai hmanruate laka inthiarfihlim turin ‘na takin’ a ti tih a sawi.
Iranian thuneitute erawh chuan tuna an thununna hnuaia awm nia an sawi tuipui map an tichhuak a, hetah hian strait atanga hla tak, tuma awp loh tuipui chin pawh a tel a, United Arab Emirates tuipui kam thui tak takte a huam a ni.
South Korea chuan striat-ah hian an sumdawng lawng pakhat beih niin a puak a, a kang bawk niin a sawi a. British maritime security agency UKMTO chuan lawng pahnih chu UAE tuipui kama kah niin a tar lang a, Emirati oil company ADNOC chuan an tuialhthei phur ruak zinga pakhat chu Iranian drone-in a kap niin a sawi bawk.
Nilengin UAE chhungah drone leh missile kah a nih bawk thu sawi a awm a, tuialhthei phur chawlhna pawimawh takah kangmei a chhuak bawk a, UAE chuan Iran-in beihpui an thlak chu an uar sawt tih sawiin chhang let turin dikna a nei tih a sawi.
Trump-a chuan Iran-in indo hmaa khawvel tuialhthei leh liquefied natural gas hmun ngaa thena hmun khat phurhna kawng a dan avanga khawvel puma energy inpekna buai chu chin felna tur zawngin a bei nasa hle.
Trump-a’n Israel nena Iran laka thlawhna hmanga indona a kalpui atanga thla hnih chuang a liam tawh chhungin Tehran hian a ram lawng ni lote chu a tam zawk a dang a. Thla hmasa atang khan US pawhin Iranian lawng chawlhhmun atanga lawng chhuak leh lutte chu a dansak ve bawk.
US-in kawng dan hawn tuma mission thar kalpui mah se sumdawng lawngte chuan kal tumna thar an neih hriat a ni lo va, lawng company lian ber berte chuan an kal hmain indona tihtawpa inremna a awm hun an nghah a rinawm thu an sawi.