Aizawl: All India Radio (AIR) kum 90 tlin lawmna kal zelah Thawhlehni khan All India Radio Aizawl chuan Central YMA Hall, Tuikhuahtlang-ah Musical Concert an buatsaih a. IPRP&S Minister B. Lalchhanzova’n khuallian niin a hmanpui.
IPRP&S Minister B. Lalchhanzova chuan AIR kum 90 tlin chu lawmpuiin, Mizo hnam zia leh tawng vawn him kawngah tangkai takin hna an thawk a, Mizo hnam nun vawng himtu pawimawh tak an ni, a ti.
Tunlai khawvelah hnam ral tam tak an awm tawh tih sawiin B. Lalchhanzova chuan, hnam ziarang leh tih dan hrang hrang vawnhim kawngah theihtawp chhuah a tul thu a sawi a. Mizo thu leh hla chawi lar kawngah te, mahni hnam ngaisang tura inzirtir chungchangah te leh nun dan tha mi dang zirtir kawngah an thawh hlawk hle a ni, a ti bawk.
AIR Aizawl Director leh Mizoram Cluster Head DR Lalropuia pawhin AIR bul tan dan a sawi a. India ram zalen hma atang tawhin mipuite awi tleitu ber an lo ni tawh thin a, thuthar puanchhuahna ringawt ni lovin India hmasawnna tura thawktu sorkar leh mipuite thlunzawmtu tangkai tak an nih thu a sawi a. Viksit Bharat 2047 hmalaknaah pawh Radio chuan mawhphurhna pawimawh tak a nei tih a sawi bawk.
He hunah AIR Top Grade Artist Vanhlupuii leh ‘A’ Grade Artist pali – Laltlanthangi Pachuau, Siampuii Sailo, C. Vansanga leh Rualthankhuma Chhakchhuak te chu minister-in chawimawina memento a hlan a ni.