Aizawl: Mizoram Board of School Education (MBSE)-in kumin Higher Secondary School Leaving Certificate (HSSLC) exam result a tihchhuah taka Science, Arts leh Commerce stream-a pakhatna theuhte chawimawina hun MZP buatsaih chu RD&A department Minister Prof Lalnilawma’n khuallian niin a hmanpui, topper-te hi chawimawina leh lawmpuina thilpek a hlan nghal bawk.
Thawhlehnia I&PR Auditorium, Treasury Square-a hun hmanah RD&A Minister Prof. Lalnilawma chuan thusawiin, MZP-in zirna kawnga tithate chawimawina hun a buatsaih thin chu lawmawm a tih thu a sawi a. Topper-te chu inthlahdah mai lo tur leh, sang tak an thlen tawhna chu a aia sang zawk thlen theitu a ni tih hria a, tang mar zual sauh sauh turin a fuih.
Minister chuan vawiina an thil tawn chu duhthlanna dik an hman avanga an thlen a ni tih hre tel tura chahin, an hma hunah pawh duhtlanna dik pawimawhzia chu hre reng turin leh, mahni zawn theuhvah hmasawn tum a, hlawhtlinna chang chho zel turin duhsakna a hlan nghal bawk.
MZP President Dr. C. Lalremruata leh Lalhruaitluanga Chawngte, Advisor, MZP General Hqrs-te pawhin zirlaite fuihna thu an sawi bawk.