Hmeichhe band huhang ngah leh thawm na thin tak The Pussycat Dolls chuan North America lama tour nei tura ruahmanna hrang hrang an lo siam tawh chu an cancel rih.
Thuchhuah an siamah Dolls chuan, Forever tour nei tuma an lo inruahmanna hrang hrangte chu loh theih lohna avangin cancel a lo ngai ta an ti a, pawi an tih thu leh anmahni ngainatute hriatthiamna an ngen thu an sawi.
The Pussycat Dolls hian March thla khan reunion tour an neih tur hi tichiangin, anmahni pawh theihtawp chhuaha an inbuatsaih thu an lo sawi tawh a, North American tour nei tur hian June to August atangin ruahmanna siam an tum thu an lo sawi tawh a ni.
An band member Kimberly Wyatt, Nicole Scherzinger leh Ashley Roberts te chuan thathum tawh lam an nih avangin an tan inhmuhkhawm leh zai thlengin a harsa tawh nia sawiin, an last tour ni ngei tura ngaih hi an ngaihhlut thu an sawi a, mahse tunah chuan tiamchin awm lova an thulh a ngaih tak thu an sawi. A hun leh ni tur erawh a lo la awm ngei ang, tiin anmahni ngaisangtute chu thu an chah thung.