Aizawl: Social Welfare Minister Lalrinpuii chuan Mizorama sikul hrang hrangte chu pass percentage neih that leh top 10 tling neih tam aiin, chhawr tlak zir chhuak neih thatah inel thin zawk se a duh thu a sawi.
Lungleia Bethesda Higher Secondary School chuan nimin khan Lunglei Chanmari-a UPC Conference Hall-ah kumin Higher Secondary School Leaving Certificate (HSSLC) Examination result chhuaka an zirlai Class–Xll pass mi 74-te pualin Graduation Day 2026 an buatsaih a. He hun hmanpuitu Health Minister ni bawk Lalrinpuii chuan Mizoram sorkarin Mizorama lar chho mek zirna hmanga sumdawnna tihnep tuma hma a laknaah, kuminah MBSE result bu-ah top 10 tar lan a ni ta lo tih sawiin, school hrang hrang chu pass percentage neih that leh top 10-a tling neih tamah ringawt inel lovin, chhawr tlak zir chhuak (alumni) neih thatah te inel thin zawk se a duh thu a sawi.
Lalrinpuii chuan zirlaite chu anmahni leh an chhungkaw tan rin tlak, rin ngam ni a, eng hna pawh thawk se hlawhtlinna tluantling nei thei tura taima taka an zirlaite bei zel turin a fuih a. Khawvel chu a chak chak emaw, a fing fing emaw din chhuahna ni ngawt lovin, danglamna mila inher rem thiam apiang vanneihna a nihna hmu thiam turin zirlaite leh zirtirtute fuihin, zirlai hlawhtling tharte chu tun lai mila inher rem chho zel a, hnain thiamna a phut leh ei zawnna atana hman theih tur zirna course thlang thiam turin a chah bawk.