Aizawl: Chief Minister Lalduhoma chuan Aizawl Municipal Corporation (AMC) Sport Complex (Brigade Field) chu inkhelhna tlaka siam that ngei an tum a, chumi atan chuan Rs nuai 500 an dah thu a sawi.
ZPM Thalai General Headquarters hruaituten Ningani khan Chief Minister Lalduhoma chu a pisa-ah an kawm a. AMC Sport Complex (Brigade Field) leh NH-06 kawngpui siamthat mek chungchanga hmalaknate an sawipui.
An inkawmnaah hian Chief Minister chuan, Mizo thalaite hmakhua ngaia AMC Sport Complex siamthat chungchang ZPM Thalai ten an bawhzui chu lawmawm a tih thu a sawi a. ZPM chuan siam that hna an thawh rualin hmasawnna thar an thlentir mek a, AMC Sport Complex (Brigade Field) pawh inkhelhna tlaka siam that ngei an tum a, chumi atan chuan Rs nuai 500 an dah a, he field hmang tangkaitu tur Mizo thalaite pawhin an nghakhlel hlea a hriat thu a sawi.
NH-06 chungchangah Chief Minister chuan, kawngpui tha an neih theihna tura sorkar leh mipuiten theihtawp an chhuah hona a zarah hmasawnna an hmu chho zel niin a sawi a, furpui a lo thlen apianga kum tin kawngpui chhia avanga harsatna an tawh thinte pawh kuminah chuan an pumpelh thei dawna a lan thu leh NH-06 chungchangah NHIDCL leh MoRTH te nen thawhona tha tak an neih thu a sawi.