Africa ram thenkhata Ebola leng mek avangin India-ah pawh inven leh fimkhurna thil kalpui tan a ni a. Khawpui liana thlawhna tumhmun thenkhatah chuan passenger-te endik kalpui tan a ni.
Hri leng avanga khawvel puma hriselna chungchanga hriattirna tihchhuah a nih hnuah Ebola kai enkawlna leh thlawhna tumhmuna passenger thleng tharte screening kalpuina tihchak thar a ni.
Kerala-a Kochi-ah chuan inrinna atana thutkhawma rel angin rinhlelhawm thleng tharte chu darkar 24 chhung thlithlai zui tura tih a ni a. Tamil Nadu-a Chennai-a lut tharte pawh chhuah an nih hmain Ebola veite awm dan angin an awm em tih leh an hriselna dinhmun endik zel tura tih a ni.
Kochi International Airport-ah hian airport management leh Airport Health Organisation an thutkhawm hnuah Cochin International Airport Limited (CIAL) thupuangtu chuan natna lan chhuak hriat hma theih nen leh vantlang himna atan darkar 24 chhung thlithlai turin an ti tih a sawi.
Ram dang atanga lutte chu thermal screening ni 21 chhung an zin tawhna en ngei ngei tura tih a ni.
Democratic Republic of Congo, Uganda leh South Sudan telin ram eng emaw zat atanga khualzinte phei chu Ebola avangin an ngaihven lehzual an ni ang.
Thuneitute chuan inbuatsaihna kalpui mek zingah Ernakulam, Kalamassery leh Aluva-a damdawi in hrang hrangah isolation ward ruahman a nih thu an sawi bawk.
Chennai International Airport thuneitute chuan passenger-te tana thu rawn tichhuakin Ebola lena ram atanga kal emaw, kaltlang emaw chu an chhuah hmain Airport Health Officer emaw, health desk emaw hnenah inhriattir turin an ngen.
Thurawn hi DR Congo, Uganda leh South Sudan atanga kalte tan niin a bikin khawsik, chau, luak chhuak, ril\am, lu na emaw, chhan hriat loha thisen chhuah emaw ang chi nei te tan a ni.
Delhi-a Indira Gandhi International (IGI) Airport-ah pawh fimkhurna kalpui tan a ni bawk a. Passenger thleng tharte screen an nih bakah hri lenna ram atanga thlengte phei chu a bik taka dawnsawn an ni.
World Health Organization (WHO)-in Ebola hi Public Health Emergency of International Concern (PHEIC)-a a puan hnuah fimkhurhna kalpui a ni a. Tun thlengin India-ah hian a vei hmuh an la ni rih lo thung.
Ebola hi natna hrikin a thlen a ni a, a leng zen zen lo va; mahse, a na hle a, a tam zawkah chuan thihna a thlen thei a. Chi hrang hrang a awm a; tuna DR Congo-a a chi (strain) hmuhchhuah hi Bundibugyo virus vanga awm a ni a. WHO chuan he hri leng hi khawvel pum huapa vantlang hriselna khawih theih, ngaihven ngaiah a puang.
A tir lama a lan chhuah dan chu tlang hri leng ang deuhvin – khawsik, lu na leh hahna te hi a ni a. A zual zel chuan luak chhuak leh kawthalo a lo thlen zui thin.
Hemi hnuah damlo thenkhat chuan chhungril leh pawn atanga thisen chhuak an nei a, taksa peng thenkhat, kal leh thin ang chi te chu a chhe thei a, hna thawk thei lovin a siam thei a, thihna thlen thei a ni
Hri kai atanga ni hnih atanga ni 21 inkarah a natna hi a lang thin.
Ebola virus hi rannunga kai a ni ber a, a bik takin bak chi khat (fruit bat)-in an kai thin a. Mihringah chuan hri kai rannung atanga Ebola a kai thei a. Mihring hian a taksa tuihnang, thisen leh a luak atangin a mihringpuiah a kai leh chhawng thin.
He natna a len nasat ber chu kum 2014-16 kha a ni a, Africa khawthlangah mi 28,600 velin an kai a ni.
WHO chuan Bundibugyo virus bikin a thlen Ebola hi a invenna emaw, a enkawlna damdawi emaw pawm a la awm lo niin a sawi a. Zaire strain Ebola bik erawh vaccine a awm tawh thung.