Pakistan chhimthlang lam, Balochistan province khawpui, Quetta-a car bomb hmanga thihchilha sipai phur rel beihnaah mi 24 an thi a, mi 50 chuangin hliam an tuar bawk.
Pathiannia beihna thleng hi inlak hran duhtu pawl, Balochistan Liberation Army (BLA) chuan mawhphurtu an ni tih an sawi.
Rel kawng bula in leh building eng emaw zat chu nasa takin a chhe tel a. Bomb puak vang hian rel pindan thenkhat chu a let a, a kang nasa hle bawk.
Tual chhung chanchinbute chuan Quetta-a sorkar damdawi inah emergency puan a ni a, doctor leh thawktu dangte chu duty-a awm reng tura tih an ni.
Online-a video leh thlalak darhah chuan lirthei kang leh rel pindante chu a let remrum a, van lamah meikhu dum tak a invawrh chho bawk.
Tun hnai thla eng emaw zat chhungin Pakistan-ah hian inlak hran duh pawlte chetna eng emaw zat a thleng a. Balochistan-a Beijing-in infrastructure project a kalpui mek dodalna avangin Chinese hnathawkte pawh an bei nasa hle a. China-Pakistan Economic Corridor hnuaiah China-a Xinjiang bial chu Pakistan-a Gwadar lawng chawlhhmun nen thlunzawm tum a ni.
Pakistan Prime Minister Shehbaz Sharif-a chuan X-ah pawikhawihna thleng a dem thu a tar lang a. “Hetianga dawizep taka thil tite hian Pakistan mipuite thatna tur chu a tichak lo thei chuang lo va, firfiakte hi a chi hrang hrang leh a lan dan zawng zawnga tihbo kan tumnaah hian kan nghet tlat a ni,” a ti.