Hmarchhak state hmasawnna tura pawimawh tak, Regional Review Meeting kaihruai turin Union Minister for Fisheries, Animal Husbandry & Dairying leh Panchayati Raj, Rajiv Ranjan Singh chu Pathianni tlai khan Aizawl a lo thleng.
Sorkar laipui Ministry of Fisheries, Animal Husbandry & Dairying buatsaihin Thawhtanni hian Aizawlah ‘Regional Review Meeting: Northeastern Region 2026’ hman a ni dawn a. He hunah hian sangha khawi, ran vulh, leh bawnghnute thar chhuah kawnga hmarchhak state-te hmalakna leh sorkar laipui scheme hrang hrang hman tangkai dan te thlirho a ni ang.
He meeting-ah hian hmarchhak state dang — Arunachal Pradesh, Assam, Manipur, Meghalaya, Nagaland, Sikkim, leh Tripura atangin sorkar aiawhte an rawn tel dawn a ni.
Meeting piah lamah hian Union Minister hian Pradhan Mantri Matsya Sampada Yojana (PMMSY) leh Fisheries and Aquaculture Infrastructure Development Fund (FIDF) kaltlanga hmasawnna tur project, Rs vbc 32.15 hu a hawng nghal dawn a. Hei bakah hian vawk hri (African Swine Fever) laka invenna tur awareness film leh zirtirna lehkhabute a tlangzarh nghal dawn bawk.
Union Minister hi Lengpui Airport-ah AH&Vety Minister C. Lalsawivunga, Fisheries Minister Lalthansanga leh official dangten lo hmuakin, Chief Minister pisa an pan nghal a ni.