Kumin nipui hian football ngainatute chuan Fifa World Cup lamah an rilru an pe thup dawn a, khelmual pawn lamah chuan North America-a inelna neih chhung leh a zawh hnuah bazar a inhawn dawn avangin an indawr kual nasa viau dawn a ni.
Nikum nipui bazar inhawng chhung khan pawisa an hmang nasa hle a, a bik takin Premier League club-ten an hmang hnem hle a. Player lian inthleng kual a tam hle bawk a, kuminah pawh ram leh ram inelnain ngaihven hlawh zawk dawn mah se thil danglam a thlen beisei a ni lo.
Khawvel hmun hrang hranga club-te chuan 2026-27 season hmachhawn turin an team tichak thei tur player an zawng nasa dawn hle a, Europe khawmualpuia club liante chuan an sum ngahzia an pho lang leh ngei dawnin a lang.
Engtik atangin nge club-te an indawr tan theih dawn? Kumin nipui bazar chungchanga hriat tur pawimawhte chu a hnuaiah hian tar lan a ni.
Europe khawmualpuia league liante bazat theih hun chhung hi a inang dawn lo a, Premier League chu league dangte aiin an hawng hma dawbn a. England-a league sang ber club-te hian June 15 atangin player an la lut tan thei ang.
Serie A chuan June 29-ah bazar an hawng ve leh ang a, La Liga, Ligue 1 leh Bundesliga ten zuiin July 1 atangin an indawr tan ve thung ang.
Saudi Pro League chu a hnu deuh, July 22-ah a inhawng ang a, Major League Soccer mid-season market erawh July 13 atangin hawn a ni ang.
Club-te hian an ram bazar a inhawn tak tak hmain player-te nen inremna an nei thei ang a; mahse, a inhawn ni a thlen hma chuan player lak luh leh hralh hi tihfel theih a ni lo thung.
Free agent-te chuan engtik hunah pawh club an zawm thei thung a ni.
League dangte aiin kar hnihin hawng hma mah se Premier League chu Europe khawmualpuia league sang panga zinga a dangte nen a inkhar hun a inang thawkhat dawn a ni.
Premier League leh Bundesliga-ah chuan August 31 hmain indawr zawh vek tur a ni a. La Liga, Serie A leh Ligue 1 te erawh a tukah an inkhar ang a. MLS nipui bazar chu September 2-ah a inkhar ang.
Heng hunte a liam hnuah chuan club-ten player thar la lut turin thlasik bazar hun thlen hma chu an nghah a ngai dawn a ni.
League hrang hrang transfer window inhawn hunte:
Premier League : June 15 – August 31
Serie A : June 29 – September 1
La Liga : July 1 – September 1
Bundesliga : July 1 – August 31
Ligue 1 : July 1 – September 1
MLS : July 13 – September 2