Aizawl: Mizoram tlawhtu, Union Cabinet Minister of Panchayati Raj, Fisheries, Animal Husbandy & Dairying Rajiv Ranjan Singh leh Chief Minister Lalduhoma te inkawmin Mizoram tana hmasawnna tur hrang hrang an sawi dun.
Union minister hian Pathianni tlaia Aizawl a thlen rualin chief minister bangla tlawh nghalin chief minister a kawm a. Singh-a chuan Mizoramin mamawh a lo thlen tawh, Whole Sale Fish Market sakna te, Integrated Aqua Park sakna tur te, Paddy cum Fish Culture district tam zawka cluster kalpuite chu tihhlawhtlinsak a tum thu chief minister hi a hrilh.
Sangha dil thar laihna te, a awmsa tihlen leh cheina te, sangha khawitute tanpuina lam hmalaknate chu Prandhan Mantri Matsya Sampada Yojana (PMMSY) 2.0 a rawn chhuak thuai dawn tih hrilhin, Mizorama a kalpui dan tur tha an mamawhte chu thehlut a, PMMSY 2.0 ah bilh luh an tum dawn tih a sawi.
Union minister chuan Transport Subsidy for Animal Feed pawh hi an lo bawhzui tur thu te, ran chaw (animal feed) lam hi chu Mizoramah hian nasa zawkin kalpui (local plantation uar) se a tha bera a rin thu sawiin, chief minister thu thlente bawhzui an tum thu a sawi bawk.
Chief Minister Lalduhoma pawhin union minister zin chu Mizoramin a hlawkpui ngei a beisei thu sawiin, Fisheries leh AH & Vety lama Mizoram mamawh hrang hrangte a sawipui bawk.