Sorkar laipui hnuaia Department of Fisheries chuan Thawhtanni khan Aizawlah ‘Regional Review Meeting: Northeastern Region 2026’ a buatsaih a. He hun hi Union Minister Rajiv Ranjan Singh leh Minister of State George Kurian te kaihhruaina hnuaiah High Court Hall, MINECO-ah hman a ni.
Thutkhawmah hian Mizoram Fisheries Minister Lalthansanga bakah hmarchhak state hrang hrang – Assam, Arunachal Pradesh, Meghalaya, Manipur, Tripura, Sikkim-a fisheries minister leh Nagaland sorkara Fisheries & Animal Husbandry minister-te an tel.
Union Minister Singh chuan Pradhan Mantri Matsya Sampada Yojana (PMMSY) leh Fisheries & Aquaculture Infrastructure Development Fund (FIDF) hnuaia hmalakna hrang hrang, Rs vbc 32.15 senna tur project pawimawh hrang hrang a tlangzarh a. Hmarchhak bial chu sangha khawi leh ornamental fisheries kawnga hmabak lian tak nei a nih thu sawiin, Mizoramah chauh pawh Rs vbc 50 senga cold chain facility awmna tur ‘Fish Marketing Centre’ siam tura pawm a nih tawh thu a sawi a. State hrang hrangte chu project-te hun taka zo turin ruahmanna tha tak siam turin a chah.
Union Minister of State Kurian pawhin sangha thar tihhmasawn nan khawvel thiamna thar hman uar a, hralh chhuah zung zung a nih theih nana supply chain leh transportation tha siam a pawimawh thu a sawi.
Dr. Abhilaksh Likhi, Secretary (Fisheries) chuan thiamna thar, Biofloc hman leh sangha thlah thlan bik (quality seed) pawimawhziate sawiin hmasawnna tlo a awm theih nana private sector leh thalaite luhpui a ngaih thu a sawi bawk.
State minister hrang hrangte chuan tual chhung kuthnathawktute tana hmalakna hrang hrang an neih dante thlir letin hmarchhak bial tlangram thil thlirin PMMSY hnuaia unit cost-te ennawn turin sorkar laipui an ngen.
He huna tar lan a nih danin, sorkar laipui chuan PMMSY hmang hian hmarchhak bialah Rs vbc 2,228 zet a invest tawh a ni.