Union Home Minister Amit Shah chuan ramria state-te a tlawh dawn a. Indo-Pakistan leh Indo-Bangladesh ramri bula India tanhmunte pawh a tel dawn a, thla leh hian khawchhak lam ramri a tlawh hmain khawthlang lam atanga bul a tan ang.
A tlawh chhungin Shah hian smart border project a puang dawn a, mi pawimawhte nen ramri himna thlira thutkhawm a kaihruai dawn bawk.
Rajasthan-a Bikaner a tlawh hmasa ber ang a, Shah hi Thawhtan zanah thlengin officer-te nen an inkawm ang a. Thawhlehni zingah Bikaner-a Border Security Force (BSF) awmna hmun hla tak, Sanchu post a tlawh ang.
Sanchu-ah hian ‘Prahari Sammelan’-ah a tel dawn a, hmun khirh takah BSF sipaite nen hmaichhanah an inkawm ang a, hmeichhe sipaite tan barrack pawh ral atangin a hawng ang.
Thawhlehni chawhnuah Shah hian Ministry of Home Affairs (MHA), Rajasthan state sorkar leh ramri district panga-a Superintendent of Police (SP)-te nen venhimna sawihova thutkhawm a kaihruai ang.
Thuneitute chuan home minister hian smart border project leh khawthlang lama nakina hlauhawm awm thei dona tur venhimna kalpui zel dan tur a duanpui beisei a ni.
Zirtawpni hian Shah-a hian Gujarat-a Bhuj a tlawh dawn a, hetah hian BSF awmte a enfiah dawn a, Rann of Kutch-a Harami Nala bial, hmun pawimawh tak, Harami Nala region a thlithlai dawn a. Heng hmun hi a hmunhma awm dan a rem loh avangin pawn lam atanga ram beihna atana remchang theia ngaih a ni.
June 5-ah Shah hian Tripura-ah ramri venna leh hmunhma tihhmasawn dan thlir turin a tlawh ang a. Tripura hian a hmar lam, khawthlang leh chhim lamah Bangladesh nen km 856-a thui an inri a ni.
June thla laihawl hian Shah-a hi West Bengal-ah a zin rin a ni a, hetah hian Indo-Bangladesh ramria venhimna ruahmanna siamte a thlir ang a, bawng tawlhruk, mihringa sumdawnna leh thil dang ngaihtuahawmte a sawipui ang.
West Bengal a tlawh tur hi tun thla tira state assembly inthlanpuia BJP-in Mamata Banerjee-i kaihhruai Trinamool Congress (TMC) an paih thlak atanga chawlhkar eng emaw zat hnuah a ni ang.
Tun hnaia state assembly inthlanpui neihah khan BJP hian thenawm ram atanga a ruka mi lut thin chu auhlaah an lo hmang tawh a, Shah-a telin an hruaitu lawk tak takte chuan TMC sorkar chu ramri venna leh Bangladesh atanga lut thinte titawp tura hma la tawk lovah an lo puh tawh bawk.
Inrinni khan inthlanpuiah Banerjee-i laka BJP campaign kaihruaitu, West Bengal Chief Minister Suvendu Adhikari-a chuan a sorkar chuan dan lova India-a pem lutte ‘hriat chhuah, paih leh thawn haw’ tih thutiam a neih chu a hlen chhuak dawn tih a sawi a, district magistrate zawng zawngte chu dan lova pem lut mante chu thawn haw hmaa an awmna turin ‘holding centre’ din nghal turin a ti a ni.