Aizawl: Electoral Roll felfai leh thianghlim neih theih nan Special Intensive Revision (SIR) 2026 chu taima tak leh felfai taka buaipui turin Election Commission of India (ECI) Secretary Binod Kumar chuan sorkar official-te a chah.
Thawhlehnia khan Aizawl Bawrsap Pisa Pui Hall-ah Kumar hovin Aizawl District DEO, EROs, AEROs, Supervisor leh BLO-te tana neih meeting-ah he thu hi sawi a ni a. ECI Secretary chuan SIR kalpui tura dan leh hraite hre bel tura official-te chahin, enumeration form pawh ni nga chhunga sem fel hman vek tum turin a ngen a, rampum nghawng pha thil a nih avangin theih tawp chhuah turin a fiah a ni.
He hunah hian ECI Section Officer Vijay Gupta-an a tawiawm a, meeting zawh hian Govt. Middle School, Zemabawk West-a Polling Station an tlawh nghal a ni.
Aizawl district hnuaiah hian Assembly Constituency 12 leh Polling Station 324 a awm mek a, rationalization hnuah chuan polling station 359 awm tura beisei a ni.
Tun dinhmunah voters 2,92,635 (mipa 1,36,654, hmeichhia 1,55,981) awmin, electors mapped tawh chu 2,18,623 (74.71%) a ni a, he hmalakna atan hian enumeration form 5,85,270 lai print a ni tawh bawk.