Aizawl: Central YMA -in electoral roll dik neih theih nan theihtawp chhuah an rel a. Dan lova sumdawng dap chhuak turin YMA branch te an chah.
Thawhtanni zana Central YMA Committee Room-a Central YMA President R Lalngheta kaihhruaia Central YMA Executive Meeting thukhawm chuan, Special Intensive Revision (SIR) neih turah khua leh tui dik takten an chanvo an neih ngei theih nan leh Electoral Roll dik leh rintlak kan neih theih nan theihtawp chhuah nise an ti.
Ram hmasawnna kal zelah, Mizorama dan lova hnam dang sumdawngte chungchang thlirin, branch YMA-te an huam chhung theuhvah chak zawka hma la tur leh hetiang mite dap chhuak turin inngen nise an ti a. Mizoram mamawh LPG phurtuten kawng lakah gas an lo tichingpen thin chu ngaimawhawm an tih thu sawiin, Gas Agency te pawh kawm nise an ti bawk.
Kumin YMA Day vawi 91-na hman dan tur chungchang thlir lawkin, India ram hmun hrang hranga Mizo Welfare 19 leh damdawi in thenkhatah chibai bukna (tanpuina) pek nise an ti a. TBCC, OKM leh TNT-ah te buhfai pek bakah, TBCC-ah hian free health clinic neih an tum a ni.
Kumin October 22, 2026-a neih tur ‘YMA Rorel Inkhawm vawi 5-na’ inbuatsaihna atan mawhphurhna hrang hrang an inruat nghal a; kumin August thla chhungin Inter-Branch YMA Beat Contest buatsaih leh September thlaa Mizo infiamna hmanga Branch inelna buatsaih an rel bawk.