Aizawl: Vigilance Department buatsaihin Administrative Training Institute (ATI) Auditorium-ah sorkar department hrang hranga disciplinary authority-te tan Thawhlehni khan workshop neih a ni a, Chief Minister Lalduhoma chuan a hawnna inkhawm a telpui.
Inkhawmnah thu sawiin chief minister chuan sorkar hnathawktu tha leh inpe zo neih a pawimawh thu sawiin, chhawrtlak lohte zawn chhuahna tur ‘Service Review Committee’ department hrang hrangah din vek a nih thu leh a tul phei chuan special pension thlenga pek mai theihna tur scheme siam a ni tih a sawi.
Disciplinary authority-te chu hna thawh tha lo lakah dan anga chak taka hma la turin a chah a, Enquiry Officer-te pawh thlei bik nei lova thudik chauh hmanraw hmang tur leh tehna dik tak hmanpui turin chief minister-in ngen a ni. Sorkar laipui rate angin Inquiry Officer leh Presenting Officer-te lawmman (honorarium) pawh tihsan a nih thu a sawi bawk.
Quarterly Report hnuhnung ber (March 2026) chungchang sawiin chief minister chuan, department thenkhatin vigilance case an neih nual laiin Agriculture, AH & Vety, Art & Culture, Forest, Law leh Tourism department-ten case engmah an nei lo chu lawmawm a tih thu a sawi a, case nei department-te pawh tang thar turin a chah.