Chanmari veng mipuite leh an veng chhunga lawilutte him zawk nan ‘Save Chanmari’ tih vuahin Chanmari mipuite leh security-te zan lamah an duty tan dawn.
Chanmari Local Council leh Chanmari Branch YMA chuan tun hnaia an veng chhunga lirthei khalh fimkhur loh vanga chetsualna leh thihna hial a thlen bakah insual buaina chhuak thin chu pawi an ti a. Heng thil pawi thleng tiziaawm tur hian May 27, 2026 zan khan thutkhawm hmanhmawh neiin veng chhung himna tura hmalakna tur an rel.
Thutkhawmah hian veng mipui leh Chanmari tlawh thintute an him zawk nan Chanmari mipuite leh security-te tangkawp chu zanah duty tawh turin hmalak an rel a. He hmalakna thar, ‘Save Chanmari’ an vuah chu May 29, 2026 zan dar 9:30-ah Chanmari kawnah an hawng dawn a. Chanmari hruaitute chuan he veng himna hna thahnemngai taka thlawp a, pen chhuak turin veng mipuite chu an ngen hle.
Chutih rualin Chanmari veng chhungah lirthei chak taka tlan thin leh buaina siam chingte chu fimkhur turin an hriattir a, tual chhung thuneitute chuan dan bawhchhetute chu an phu tawk hremna an hmuh ngei theih nan hma an lak zui tur thu an rel bawk.