Aizawl: Health Minister Lalrinpuii chuan Civil Hospital Aizawl Conference Hall-ah Mizoram Government Nursing Service Association (MGNSA) Conference vawi 23-na, ‘Soft Skill for Nurses’ tih thupui hmanga neih chu nimin khan a hmanpui.
Health minister chuan nurse hna chu inpekna leh dawhtheihna thuk tak, mamawhtu mi bik hna a nih thu sawiin, sorkar chuan an indaihlohna phuhruk nan leh health scheme hrang hrang tihlawhtling turin hma a lak nasat thu a sawi a. April, 2025-a Mizoram Universal Health Care Scheme tan a nih dawn khan nurse 300 chuang lak an ni tawh a, tun hnaiah a nghetin nursing officer 10 lak belh niin, contract-in nurse 40 leh senior nursing officer 10 lak leh thuai an nih tur thu a sawi a. Hemi bakah hian nursing school leh college lama thawktu mamawh te pawh MPSC kal tlangin lak belh belh tuma ruahman mek a nih thu a sawi.
Health sector tihchangtlunna atana sorkar hmalakna hrang hrang sawiin health minister chuan, Civil Hospital Aizawl-ah Cath Lab, MRI khawl, VIP line current, leh oxygen pump khawl tharte dah fel a ni tawh a, mipuite chhiah tlingkhawm atangin Rs nuai 120 man Artroscope khawl thar lei a ni bawk. Kal thlakna hna tan thuai tura inzaina bungrua lei mek niin, thawktute pawh Kolkata-ah training-tir an ni tawh a; ZMCH-ah pawh lung leh thawkna lam inzaina ti turin thawktute PGI Chandigarh-ah training tir an ni bawk. Chutih rualin Siaha leh Champhai-ah CT Scan khawl thar dah a ni a, Mamit District Hospital building thar peih fel tawh niin Serchhip, Kolasib, leh Hnahthialah damdawi in sak mek a nih thute a sawi.
He conference-ah hian National Florence Nightingale Award dawngtu, V. Lalhmangaihi leh H. Mankimi te bakah hruaitu chawimawina Lalhmingmawia Thangluah hnenah hlan a ni a. Member boral ta pakhat sunna hun leh pension mi 51 thlahna hun te hman a ni.