Aizawl: Mizoram People’s Forum (MPF) Governing Board chu Ningani khan Synod Committee Room-ah an President Rev. John Raldosanga kaihhruaiin an thukhawm.
Thutkhawmnaah hian April 21, 2026-a Aizawl Municipal Corporation (AMC) inthlan neih tak an thlir let a, inthlanna thianghlim a awm theih nana Local Forum leh Constituency Forum-te’n theihtawp chhuaha an bial chhung hneh taka an vil chu lawmawm an tih thu an sawi.
Board chuan hmun thenkhatah MPF leh political party-te thawhhona thuthlung hriat chian tawk lohna te la awm hlek mah se, inthlanna tluang taka kalpui a ni chu lawmawm an ti hle a, kumin chhova MPF hmalak zel dan tur ruahmanna hrang hrang thlirin thalaite leh zirlaite hnena sorkar tha (good governance) pawimawhna inzirtir te, media chakna hman tangkai leh kawng hrang hranga hma lak chhunzawm dan tur te an sawiho bawk.
Heng bakah hian November 6, 2026-a MPF Annual General Meeting neih tura ruahman lawk ngai hrang hrangte pawh a tul anga bawhzui nise an ti bawk.