MPCC Treasurer Dr. Lalmalsawma Nghaka chuan Ningani khan Aizawl Press Club-ah thuthar thehdarhtute kawmin ZPM sorkarin mipui a lainat a nih chuan fuel cess a lak mek tihtawp rih a phut.
MPCC Treasurer chuan India ram pumah fuel (tuialhthei) man sang zelin mipui hnenah harsatna namen lo a thlen mek thu a sawi a. BJP sorkar kalphung leh PM Modi economic policy dik lo avangin Indian economy, foreign exchange reserve leh pawisa hlutna te a tlahniam nasa hle a, ram leiba pawh kum 2014-a Rs 52 lakh crore ni thin kha tunah chuan Rs 216 lakh crore a tling tawh tih a sawi.
Central sorkar hian kum 11 chhungin petroleum product atang hian chhiah lakhawmin Rs vbc 43 vel hlawkna a lo tel tawh a, oil man a tlawm lai pawhin chhiah a tihniam duh chuang lo a ni tiin, tun dinhmunah hian mipuite chhawmdawl nan hmalakna sang hrang hrang kalpui tur a nih zawk thu a sawi.
Mizoram bik chungchang sawiin, Dr. Lalmalsawma Nghaka chuan ZPM sorkar kal phung chu thlirin, mipuite a lainat tak zet a nih chuan tun hnaia fuel cess a lak mek hi titawp rih turin a phut a. Sorkar thar hian diesel-ah litre-ah Rs 7.56 leh petrol-ah Rs 5.31 zelin man a tihsan a, tun thlengin OIL/POL atang hian chhiah Rs vbc 143 chuang a khawn khawm tawh a ni, a ti.
Tuialhthei man tisangtute hian sorkar atang hian a thlawnin petrol leh diesel coupon an dawn bik laiin, mipui hnen atang erawh chhiah nasa taka lak a ni a; chutih rualin sorkar tharah hian post siamchawpin ZPM hruaitu tam tak ruat an ni a, heng mite enkawl nan hian sorkar sum thahnem tak sen a ni dawn a ni tiin, eizawnna leh hmasawnna kawnga ZPM sorkar hmalakna chu thil pawi tak a nih thu a sawi bawk.