Aizawl: Agriculture Minister PC Vanlalruata chuan May 29, 2026 khan New Delhi-a ‘National Conference on Agriculture for Kharif Campaign’ neihah thu a sawi a. India rama agriculture kaihhnawih conference-ah hian central sorkara agriculture minister leh hotu pawimawhte bakah state hrang hrang minister leh official te an tel.
Agriculture minister chuan Mizoram tlangram angah chuan a fur a thala zawh theih feh kawng neih a pawimawhzia sawiin, India hmarchhakah ruah tui a tam avangin kuthnathawktuten an huan ram panna tur kalkawng tha an mamawh hle tih a sawi a, kalkawng tha zawk an neih theihnan central sorkar chu thawhpuiah a sawm.
Minister chuan ruahtui khawlna tur tuizem lian zawk leh tha zawk te pawh Mizoramin a mamawh thu a sawi bakah, Price Support Scheme hnuaia behliang, chhawhchhi leh nihawi te lei tan a nih tur thu a sawi bawk.
Mizoramah district thar pathum a awm tak avangin KVK pathum mamawh belh a nih thu sawiin, KVK thar dinna tur proposal pawh thehluh a ni tawh a, approval a chhuah vat theihnan central sorkar tanpuina a ngen nghal a. Mizoram chu India ram hmun dang, phai lam te ang lo takin tlangram leilung leh boruak dai nuam tak nei a nih avangin, central scheme te pawh ram leilung mila tihdanglam theih ni se tiin rawtna a thlen a, farmer ten hma an lo sawn zel theihnan central sorkar chu theihtawp chhuaha thawhpui a inhuam thu a sawi bawk.
Conference-ah hian fur thlai chin dan tur (kharif season) leh a kaihhnawih hrang hrang te sawi ho niin, fertilizer hman fimkhur a tulzia te, natural farming ngaih pawimawh a tulzia te leh India ramin ram dang atanga edible oil a lak luh titlem tura oilseeds lama tan lak a tulziate an sawiho a ni.