Aizawl: BJP Mizoram State President Dr. K. Beichhua chuan, Prime Minister Narendra Modi kaihhruai NDA sorkar hnuaiah hmarchhak bial hnufual tak thin chuan nasa takin hma a sawn ta tih a sawi a. Union minister tam takin Mizoram an tlawha an ngaihsakna an lan tir chu mipuiin a hlutzia an hre phak lo lek lek zawk niin a sawi.
Thawhtannia an party chhung inkhawmah thu sawiin Siaha bialtu MLA Dr. K. Beichhua chuan, tun sorkar hun chhung hian Union Minister hrang hrangte chu vawi tam tak Mizoramah an zin tawh tih a sawi a. Sorkar laipui hotute hian Mizoram kawtkaiah ngei rawn kalin, an harsatna leh puih an ngaihna te an rawn enpui thin chu a ropui hle a ni, a ti.
Union Minister lo kal hnem tawh zia sawiin Dr K Beichhua chuan, tualchhung mipui tan pawh lo hriat sen loh hial khawp a ni tawh tih leh, an lo zin ngun hlutna hi Mizoram mipuiin an hre phak lo lek lek zawk a ni, tiin a sawi a. India sorkar laipuiin hmachhawp hrang hrang hmanga hmarchhak state-te ngaihsakna a lanttir reng avang hian hmabak eng tak an nei tawh a ni, tiin a sawi bawk.
State President chuan sawi chhunzawmin, Vajpayee sorkar laia Ministry of Tribal Affairs leh Eklavya School te din a nih hnuah, tun sorkar thlengin hmarchhak state ngaihsak zui niin DoNER Ministry hial din a nih thu a sawi a. PM Modi sorkar kum 12 chhungin Cabinet leh Union Minister-te zingah corruption avanga hmingchhia an awm loh thu a sawiin, Mizoram mipui, NGO leh Kohhrante chu BJP kalphung zir chiang turin a chah nghal a ni.