Mizoram Excise & Narcotics Department chuan Thawhtanni khan Commissionarate, Aizawl-ah Central YMA hnenah ruihhlo dona atana hman tur lirthei an hlan.
Lirthei hlante hi nikum March ni 15-a Union Home Minister-in Aizawl a tlawh tuma Central YMA-ten ruihhlo dona hmanrua atana an lo dil tawh kha a ni a. Thawhtanni khan Eeco Van pathum leh Mahindra Bolero Camper pathum, a vaiin lirthei paruk hlan a ni a, an dil bang Bolero Camper pathum dang leh chu a lo thlen huna hlan leh tur a ni ang.
Excise & Narcotics Department Secretary C. Lalruaia kaihhruai hlanna inkhawm neihah Central YMA President R. Lalngheta chuan, ruihhlo dona kawnga harsatna an tawh kara lirthei thar an dawng chu lawmawm a tih thu sawiin, Excise Department nena an thawhhona chu a that reng thu leh nasa zawka thawhho zel an inpeih thu a sawi.
Excise Minister Lalnghinglova Hmar pawhin he hun hi ni chhinchhiah tlak a nih thu sawiin, Mizorama ruihhlo dona kawnga pawl thawhhlawk ber YMA-in lirthei an dawng chu lawmawm a tih thu a sawi a. Ruihhlo do kawngah hian ‘Public-Private Partnership’ ang takin mipui leh sorkar an tang tlang tih a sawi a. India sorkar hnuaia Narcotics Control Bureau (NCB) pawhin YMA hmalakna hriain Mizoramah office neih an duh thu a sawi bawk.
Excise Minister Lalnghinglova Hmar chuan heng lirtheite hi a vailiam nghal, tlan chhuah tir nghal a ni.