Aizawl: Mizo Students’ Union (MSU) hruaitute chuan Thawhtanni khan Home Minister K. Sapdanga chu a pisaah kawmin BSF hna laka dan palzutna nasat tak awm leh hemi chungchanga Aizawl Police Station-a FIR an thehluh tawh dan te an sawipui.
MSU chuan March 6, 2026 khan Aizawl Police Station-ah hian FIR an lo thehlut tawh a. Mizorama cheng ni loten Mizoram mi leh sa anga insawiin document dik lo siam chawpin Mizo quota-ah hna an zawm niin MSU chuan an hmuchhuak a ni.
Hemi chungchanga FIR thehluh a nih atanga thla thum dawn a liam hnuah sorkar atanga hmalakna chin hriat tur a awm lo leh, heng mi dik lote hian vawiin thlenga hna an la thawk chhunzawm zel chu pawi an tih thu home minister hnenah hian an thlen a. Tun aia chak zawka hma laa document lem hmangtute hi man vat turin sorkar an phut a ni.
K. Sapdanga chuan MSU thu thlente chu pawimawh a tih thu sawiin thil dik lo a awm a nih chuan huaisen taka do zel tur a nih thu a sawi a. BSF hna laka dik lohna awm lakah pawh MSU nen tangrualin theihtawp an chhuah zel tur thu a lo tiam a ni.