Aizawl: India ram puma June thla chhunga kalpui tur, ‘Khet Bachao Abhiyan’ chu Thawhtanni khan Larsap General (Dr) Vijay Kumar Singh chuan Lok Bhavan, Aizawlah a hawng. He hmalakna hi Ministry of Agriculture and Farmers’ Welfare kaltlanga lei da zel tur ven leh leilung nena inrem taka lo neih chawi larna a ni.
Larsap chuan thu sawiin, thar tam duh avanga chemical fertilizer leh rannung thahna hlo hman chiam thinin ram leilung leh hriselna a tihmelhem thu a sawi a. Prime Minister Narendra Modi-a’n ‘National Mission on Natural Farming’ a lo tlangzarh tawh zuiin, leilung mila lo neih chawi lar a tul tawh hle tih a sawi a. Agriculture mithiamte chu loneitute pui turin a chah a, organic thlai thar chhuah tam leh market linkage (hralhna tha) siamsak a pawimawh thu a sawi bawk.
Central Agriculture University (CAU) Vice-Chancellor Dr. Anupam Mishra pawhin he hmalakna chungchang sawifiahin, soil health card, kisan credit card, leh crop insurance hman tangkai dan zirtirna loneitute pek an nih dawn thu a sawi.
He hun hi Agriculture Minister P.C. Vanlalruata pawhin a telpui bawk.
Khet Bachao Abhiyan hmang hian chemical fertilizer, a bikin urea hman leh hemia innghah nasat tih tlem tum niin, June thla chhung hian agriculture scientist, KVK official leh state aiawh ten seminar leh a taka entirnate neiin zirtirna an pe thin dawn a. Lo neih dan him leh hrisel zawk a awm theih nan kawng hrang hrangin hmalak a ni ang.
Heng bakah hian hlawk zawka thlai thar tura lei hriselna hriat chian pawimawhnate bakah loneitu ten an tana duan hamthatna hrang hrang atanga hlawkna an hmuh theih dan turte inzirtir a ni bawk ang.