- K. Hmingthankaia
Kan ramah hian a hman nazawngin pawl an din fo chhan hi engdang vang ni lovin, mipui hmangaihna leh ram hmasawnna tur tak tak lam emaw, mipui hmasawnna tura tanrualna tur lam aiin, anmahni hmasialna leh an hlawk theih dan tur ringawt ngaihtuah tura an tanrual theih nante, an hlawkna tur atana sawrkar nawr nan leh mipui thunun theih nana intih ropui leh intihhlauhawm der chawp vel nana pawl din hi a tam zawk an nih hmel thin khawp mai.
Sawrkarin engemaw thil tih dan tur danglam deuh, ram leh mipui, khua leh veng tana tha zawk tur leh hmasawnna, changkanna leh awlsamna tur nia a hriat a duanchhuah reng reng kha a dik a dawk pawh thlu lova lo dodal ve ringawt nghal zel kha tunhma atang tawha opposition party tinte tihdan tur emaw, lo dodal tur leh buaina siam tura eng pawl emaw lo fuihpawrh kha opposition apiang khan an tih tur ni tlatin an hre thin a ni. Chutiang tur chuan phur tak leh taima tak, fin kherek tinreng nen an che thin a ni. Chutiang thil tih chu tun sawrkarah pawh a bang chuang lova, a nasa zawk hle niin pawhin a lang.
Hei, tunah pawh ram leh mipui hmasawnna tur dik tak, ram changkang leh mi changkang, khawpui changkang kan nih ve zelna tura ruahmanna, Mizotaxi apps chu Aizawla mipui phur chi lirthei chi thum, 4Wheeler taxi, 2wheeler taxi leh 3wheeler autorikshaw-ten June 2026 chhungin an hmang vek tur tih Sawrkar thupek chu zak map lova lo dodal tum an han awm leh nghal pang rikngawt leh tawh hi. He thil lo dodal tumtute hi sawi vak ngaihna pawh ka hre lo, an zaktheilo hi ka ti lutuk a ni. Sawrkar an zah loh chu thuhran nise, mipui min zah miah lo leh ram leh mipui mitmei an veng miah lo hi an mawl hle bawk niin ka hria.
Hetianga hmasawnna leh changkanna, dik taka thil tih dan tur Sawrkarin tih a tum an lo duh loh chhan hi ngaihtuah thui buai pawh ngailo, anmahni pawhin thil dik taka tih aia dik vak lova tih hian an hlawk zawk tih an hriat avanga engemaw tia sawrkar vau zam theih mai an inbeisei vang leh, mipui tute emaw support-na hmuh mial an beisei vang mai mai tih hi hairual a ni lo.
Khawi ramah pawh awm ila, sawrkar awmna hnuaia awm kan nih phawt chuan sawrkar thu chu kan zawm mai tur a ni. Chu chu khua-leh-tui tha awmdan tur dik tak chu a ni mai. Sawrkar hnuaia thil tih phalna engpawh, intiamkamna neia phalna, permit pek kan nih phei chuan sawrkarin tih tur a tih anga tih leh, Sawrkar thu awih mai chu kan bat liau liau a ni.
Sawrkar thil tih apianga lo inrawlh ve tum phette, lo sawi ve phet tumte, lo sawisel phet leh lo dodal phet tum ve zelte hi changkanna a ni lo. Mahni mimal emaw, mahni party emaw, mahni pawl emaw tihhniamna mai mai, mi min hmuh hniamna mai mai a ni duh thin. Chuvangin, tute pawhin kan vaia tana tha tur thilah hi chuan lungrual taka thuawih taka awm i zir zel ang u.
Kan veteran politician Pu AV Pakunga’n, “Pawl thil tih anga lang si, mahse, mi zawng zawng tana tha si lo hi chu han chhui han chhui ila, chu pawl zinga tute emaw mi rilru hrisel vak lo mimal atanga lo chhuak a ni deuh zel” a lo tih angin, tuna taxi pawl hovin Sawrkar thil tih dodal an tum pawh hi an member zawng zawng chuan an thlawp kherin a rinawm loh a ni. An zingah mi rilru hrisel tak tak leh rilru changkang tak tak engemawzat an awm ve ngei awm si a. Mahse, pawl anga thil tih hi chu a zawm ve lotu nih kha nuam lo turin kha pawl kha intihlauhawm velna tura din kha a ni thin si a. Amaherawhchu, tunlaiah chuan mi kan changkang tawh a, hmanlai anga mahni pawl thil tih zawng zawng, midang tana tha lo tur lam thlenga zawm ve duh lo ngam an awm ta niin a lang. Tin, anmahni lam kaihhnawih deuh pawh nise, pawl nazawnga tel kher duh lo ngam an awm ta bawk.
Tin, Sawrkar pawh hian uluk taka a ngaihtuah hnu leh, a hlawhtlin theihna tura tha leh sum tam tak a senral tawhna, ram leh mipui tana tha zawk tur ngei ngei thil hi chu huai takin a kal tlangpui zel ngam tur a ni ang. Tun Sawrkar phei chu engkim hi mipui tana tha tur leh awlsamna lam ngaihtuah thin, Sawrkar hmasate aia tih tak takna nei ni khan kan hmuh deuh bawk si che u avang hian, engkim in tih hi chu huai takin kalpui zel ula, mipui pawhin an la thlawp zel che u niin a la lan zel hi.
Tin, chutianga in thil tih lo dodal thintu nazawngte hi chu engahmah ngai lo ula, engtiklai pawhin tute emaw hi chu sawrkarlai sawichhe pawl leh dodal pawl hi chu an awm ve reng tur kha a ni ve tlat si a. Mahse, Sawrkar hmalakna leh mipui nunphung ti khaihlak khawpa chete hi chu dim miah lovin na takin hrem zel ni se, an chunga hremna, action lak theih chi ho phei hi chu an chunga sawrkar thutheihna ngei hmanga action lak hmak hmak ni zel rawh se. Ram leh hnam hmasawnna tur an tih thuanawp fo avangin Sawrkar hi a takin che rap rap zel thin sela, ka theih tak emaw tia hetiang tih ching ho hian an sim zel mai ang. Tin, mahni hlawkna tur chauh ngaihtuah avanga buaina siam ching leh mipui nunphung tihbuai ching ho hi chu mipui pawh hian thlawp lo ngam zel ila, kan ram chu kan felfai chho zel mai anga, India ram state dangten min fak zel mai ang.
Tun kan Sawrkar hi chu a danglam deuh bawk a, an Sawrkar hnuah tute emaw party angin an memberte tan Aizawlah taxi permit pakhatmah an la pe ve lo ni khan an sawi bawk a ni. Tuna Aizawla taxi tlan ho zawng zawng hi chu tuna opposition party ni mek hoten an sawrkar laia an mi leh sate uchuak taka an lo pekte kha an la nih hmel hrih a nih chu. Chuvangin, tuna taxi pawl ho dodalna pawh hian awmzia tak tak a neih phei chu ka ring chiah lo naa, a engahmah hma, mipui mar pawh dek hmasa eih lova kawhmawh bawl zawnga thu lo neih ve nghal ringawt hi zahthlak ka tih bakah, fuihpawrhtu an awm ngei ka rin bawk avangin heng thute hi ka han sawi ta duah a nih hi.
Tin, taxi thenkhat hi sawrkar chhut dana permit nei ve si, mahse, mipui tana service tha peih tak tak lo, mipui tana chhawr naawm loh tak tak permit nei ve si engemawzat chu an awm niin a hriat bawk. Chu’ngho chu kan ram, a bik takin Aizawla taxi permit pek zat zingah chhiar tel vek an ni tho si a. Sawrkar chhut dan leh Sawrkar mit atang chuan chu’ngho chuan midang tana permit pek tur an dal lawi si a nih hmel.
A bik takin Aizawla two wheeler taxi engemawzat pawh hi mipui tana service tha peih lo an awm em? Mahni chhungkaw tan chauhva che chhuak thin, public service permit nei si an awm tam em? Mahni nawmchen nan mai maia public service permit nei an tam em? Mipui mamawhtuten an hman dawn pawha, “Ka hman lo, ka peih lo, ka duh lo” ti vel mai maia duhdah taka mipui chhang thinte hi an ni em? tihte pawh hi Sawrkar hian eng agency emaw hmangin zirchian chi a ni tawh mai lo maw? Permit cancell theih dan tam tak a awm kha.
Tin, tih tak takna nei lo tute emaw, party mi an nih vang maia tunhmaa taxi permit an lo pek ve mai mai ho hnen atang hian, kan state pawn leh India ram pawna miten an leisak leh an khalhsak hi tam tak a awmin a hriat a ni. Hengho leh Sawrkar hmasa ho permit lo pek hoin Mizoram hmngaihna nei hauh lova mahni hlawkna tur chiah ngaihtuaha mipui nunphung tibuai zawng leh, Sawrkar tibuai zawnga an chet hi Sawrkar leh mipui hian kan remti tur a ni lo.
Mi ram changkangten motor kal hlat zawng leh chuan man dik tak awlsam taka digital veka an en zung zung theih tawh laia, helaia rilru zimte put vanga tute emaw mi tlemtein lo dodal ve khanglang hi chu a thing em mai. A dodal ve lo permit neih ve duh hi kan tam tih Sawrkar hian lo hre rawh se.