SNA SPARSH hmangtu department hotu (administrative head)-te pualin Thawhtanni khan ‘SASCI & SNA SPARSH’ chungchang Meeting cum Workshop buatsaih a ni a, finance changtu, Chief Minister Lalduhoma’n a telpui.
Planning & Programme Implementation Conference Hall-a thutkhawmah hian chief minister chuan technology thar lakah central fund dawn leh hman dan a lo changkang ve zel a, hei hi awlsamna thlentu a nih thu a sawi. Nikuma thawhhona a that avangin SASCI Part 9-ah thawh that avanga incentive Rs vbc 350 an dawn thu sawiin, kuminah phei chuan reform-link incentive awm zawng zawng dawng thei turin tan lak a duh thu a sawi a. He hmalakna hi a chak lehzual nan Mizoram sorkar chuan administrative head zawng zawngte chu ‘Charter of Financial Advisers’ hnuaiah financial power a pek tak thu a sawi.
Sorkar hotute chu Mother Sanction hmuh tawh chuan a hun taka pawisa hman chhuah a, SNA SPARSH account khar vat leh, a hun taka utilization certificate (UC) peih fel zel turin chief minister hian a chah a. SASCI Part 9 thar hnuaiah sorkar scheme zawng zawng chu Direct Benefit Transfer (DBT) mode veka kalpui a ngaih tawh dawn thu a sawi bawk.
Tun sorkar kum kal mek (2026-27) hian SASCI Part 4 leh Part 9-ah Mizoram tana incentive hmuh belh theih Rs vbc 650 a awm thu sawiin, he sum hi state tana hamthatna lian tak a nih avangin hmu ngei turin department hrang hrangte tang tlang turin a chah.
He workshop hi Institute of Government Accounts & Finance leh Mizoram Finance Department-te tangkawp buatsaih a ni a. Finance Commissioner Vanlaldina Fanai-in a kaihruai a, inkhawm hawnna zawh hian mi thiamten department hotute hi zirtirna an pe zui a ni.