Aizawl: Union Minister of State for Information & Broadcasting leh Parliamentary Affairs Dr. L. Murugan chuan Thawhlehni khan Kolasib tlawhin, Deputy Commissioner’s Conference Hall-ah tualchhung NGO leh civil society hruaitute a kawm.
An inkawmnaah Dr. Murugan chuan, Prime Minister Narendra Modi-a hruaina hnuaia India hmar chhak bial hmasawnna hna hrang hrang kalpui mekte thlirlet nan leh mipuiah nghawng eng nge a neih tih a hmun ngeia endik tura lo kal a nih thu a sawi a. Kolasib district-in infiamna kawnga hmasawnna ropui tak an nei chu fakin, ram chhung leh khawvel huapa hlawhtlingna hmu tawh tualchhung infiammite a chah.
Union Minister chuan, rel hmanga inkalpawhna tihchangtlun a nih tak avangin Mizoram state pawn khualzin an pun avanga hmasawnna lian tak a hmuh thu sawiin, hmar chhak bial chu hmasawnna hrang hrangah a thang chak hle a ni, a ti bawk.
Inkawmhonaah hian NGO leh pawl hrang hrang aiawhte chuan tualchhung mamawh te an thlen a, a bik takin All India Radio (AIR) station functional loh (eng hna mah thawk lova a awm) chungchang leh, district chhung film sector tihmasawnna tura tanpuina mamawh a nih thute an thlen a. Chutih rualin, central sorkarin he bial tana hmalakna hrang hrang a kalpui te chu lawmawm an tih thu an hrilh bawk.
Dr. Murugan chuan khawtlang hruaitute rawtna leh mamawh thlente chu ngaihtuah zui a nih tur thu sawiin, district hmasawnna atan mipuite chu theihtawp chhuah zui zel turin a chah a ni.