Sorkar laipuiin state tin hnenah inrenchemna kalpui tura ngenin, hemi zawm hian Mizoram sorkar pawhin tuialhtheia inrenchemna a kalpui mek a, nilaini apiangin sorkar lirthei hmang lova pisa kal turin hriattirna a chhuah tawh bawk.
Tuialhthei hi a vang a ni lo a, sorkar laipuiin ram hran atanga a lakluhna chu indona avanga an buai mek avangin harsatna awm thei laka invenlawkna chi khat atan a ni ber.
Hetiang hi kan nih avangin tuialhthei hi a vang ta thut a ni lo a, nitin kan ramah pawh a thlen ngaiin a la thleng reng a, bur a dawh khawl leh mahni hman khawp aia tam chheprelh phal a la ni lo reng bawk. Hemi chungchangah hian June 1 khan Aizawl bawrhsap chuan hriattirna a tichhuak thar leh bawk.
Sawi tak angin tuialhthei hi a vang a ni lo a, a luh ngaiin a la lut reng a, petrol pump hrang hrangte pawhin tun dinhmunah harsatna an nei rih lo nia sawi an ni.
Mahse, tute emaw duham luat avangin kan buai thut thei a, hemi kan pumpelh theih nan hian bura dawh khawl leh mahni hman tur a hrana chheprelh tum lo ila, a hunah tak kan dawn tur kan la dawng reng tih hre chungin chiai lo ila, tuialhthei hrim hrim erawh renchem zawka hman hram hram i tum thar fo ang u.