Aizawl: Mizoram Pradesh Congress Committee (MPCC) thuneitu sang, Political Affairs Committee (PAC) Nilainia thukhawm chuan ZPM sorkarin tuialhthei atanga chhiah a lak (fuel cess) mek chu mipuite an lainat a nih chuan titawp rih turin ngenna an siam.
Congress PAC chuan kumin May 29-a MPCC Treasurer Lalmalsawma Nghaka hova press conference an neihnaa Mizoram sorkar fuel cess lak titawp tura an lo ngen tawh kha an thlawp nawn leh tih an sawi a, mipui phurrit nasa zual zel chhawk zangkhai a nih theih nan fuel cess sang tak lak mek hi tihtawp nghal a nih ngei an phut a ni.
PAC chuan fuel man sang zelin India-ah harsatna namen lo a thlen mek thu sawiin, “Fuel man sang hian hnathawk tura kal velna leh bungrua phurh mante a tisang zel a. India hian crude oil-te ram dang atanga a chawkluh tlat avangin rupee hlutna tlahniam zel chuan ram chhungah fuel man a tisang zual zel bawk,” an ti a. Hei hian ram chhungah inflation (thil man sang) tisangin, ei leh in, nepnawi, delivery leh public transport thlengin a nghawng chho nghal vek tih an sawi bawk.
Khawvel pum huapa fuel lama harsatna awm mek lai leh India ram pawhin harsatna nasa tak a tawh mek lai a nih thu sawiin MPCC PAC chuan, “Central sorkar thuchhuak anga Mizoram sorkar ngei pawhin fuel inrenchem a kalpui mek lai hian, fuel cess sang tak a lak mek hi la tawh rih lo turin kan ngen a ni,” an ti.