Aizawl: May 20, 2026 atanga September 6, 2026 inkar chhunga Election Commission of India (ECI) bul tuma electoral roll siam that runpui, Special Intensive Revision (SIR) kalpui mek chungchangah ECI Deputy Director Apurva Kumar Singh, IIS, chuan Mizoram a tlawh.
Kumar-a hian Mizoram Chief Electoral Officer (CEO) Garima Gupta, IAS, chu Nilaini khan a pisaah a kawm a. Hemi hnu hian Joint CEO Ethel Rothangpuii kaihhruaiin MINECO Secretariat Conference Hall-ah Mizoram district hrang hranga District Media Nodal Officer (DMNO)-te nen Media & Communication hma lakna kal mek an thlir ho a. Mizoramah pawh SIR hi hlawhtling taka turin mawhphurhna hrang hrang neiten theihtawp an chhuah thu an sawi.
ECI deputy director chuan India khua leh tui kum 18 tling chinte roll-a an chuan vek theih nan leh tlinna nei lote paih an nih nan SIR hi a pawimawh hle tih a sawi a. Zau taka puanzar a nih theih nan media ruahmanna fel tak siam thupui a nih thu sawiin, hma lakna thlalak leh video te social media-ah thehdarh turin mawhphurtute a chah a ni.
Kumar hian powerpoint presentation hmangin ‘Media & Communication SOP’ a zirtir a, district hrang hrang atanga hma lakna thlirho a nih bakah zawhna leh chhanna hun hman a ni bawk.
Ningani hian ECI deputy director hian ERO office tlawhin BLO-ten Enumeration Form an sem dan a enpui ang a, chawhnu lamah chanchinthar lakhawmtute a kawm ang.