Aizawl: Health Minister Lalrinpuii’n nimin khan District Hospital, Siaha tlawhin mipuite tana hmasawnna kawng pawimawh tak ni tura ruahman CT Scan khawl thar leh RTPCR laboratory thar a hawng.
Hawnna inkhawmah District Medical Superintendent Dr. Lalrosanga kaihhruaiah health minister chuan Siaha District Hospital-in hma a sawn theihna tura department hrang hrang thawhhona chu lawmawm a tih thu a sawi a. Hospital-a thawkte inpekna chu fakawm a tih thu sawiin, “Hospital-in khawl tha tak tak a neih takte hi a tam thei ang bera mipuiin an hman tangkai theih nan uar leh zuala public awareness neih a pawimawh a ni,” a ti.
Minister chuan RT-PCR Laboratory leh CT Scan tharte chu Siaha district tana bung thar kaina chhuanawm tak, health infrastructure leh diagnostic service tihchakna kawnga hmasawnna ropui tak a nih thu a sawi. Covid-19 hripui atanga natna hri hmuhchhuahna chak leh rinawm neih a pawimawhzia zirchhuah a nih thu a sawi a. RT-PCR Laboratory thar chu hrileng dang lakah pawh inbuatsaihna tha tak a nih tur thu a sawi a, Siaha district healthcare tichangtlungtu a nih ngei nan duhsakna a hlan nghal.