Aizawl: Mamit bialtu MLA Er. H. Lalzirliana chuan Ningani khan Mamit bial chhunga zirna lama hlawhtlinna changte hnenah ‘MLA Proficiency Award’ a hlan.
Award hlanna inkhawm tawi buatsaihah hian bialtu MLA chuan, zirna leh thalaite hmasawnna lamah Mamit district chu nasa takin a thang chho zel tih sawiin, hei hi khawtlang mipuite leh zirtirtu thahnemngai tak takte thawhrimna rah a nih thu a sawi a. Ram leh hnam dinchhuahna atan zirna leh eizawnnate hi Pathianin a pek rawngbawlna a ni tih vawng nung reng turin zirlaite leh officer tling tharte chu a chah a ni.
MLA hian hlawhtlinna changte hnenah lawmpuina thuziak, pawisa fai leh lekhabute a hlan a ni.
Kumina MBSE HSLC result-a Mamit bial atanga Top 10-a lang thei mi pathum — Rank 2-na Marvin Lalrinenga (Lengpui), Rank 3-na Frederick Vanlalchhuanga (Mamit) leh Rank 10-na Lallawmzuala (Mamit) te hnenah chawimawina hi hlan a ni a. Tun hnaia MPSC hnuaia tling thar Er. Emmanuel Lalrinchhana (MES) leh Asst. Professor hna hmu thar Dr. Zohmingmawia leh Dr. Vanlaltanpuia te pawh chawimawina hi hlan an ni bawk.
Bialtu MLA hian kumina HSLC leh HSSLC-ah 100% pass percentage nei thei a bial chhunga School pasarih hnenah chawimawina a hlan bawk.