March 16, 2024-a Aizawl New Market-a thah tak, V. Lalhmingthangi, Tuikual South thattua puh, Irene Lallawmzuali bail-a chhuah phalsak nia an hriat duh lohna lantirin Ningani khan Tuikual South mipuite chu MINECO-a District Court bulah an pungkhawm.
Nimin kha court-a Irene Lallawmzuali inlan ni a ni a; bail-a chhuah phalsak a ni dawn nia an hriat chu duh lovin Tuikual South Local Council leh All NGO-te rorel angin khawtlang mipui chawhma dar 10 khan court bulah an pungkhawm a ni.
Pungkhawm mipuite hian Irene Lallawmzuali bail-a chhuah an duh loh thu leh a thil tih phu tawk hremna a hmuh ngei an phut thu te au hlaah an hmang a ni.
Tar lan tawh angin, V. Lalhmingthangi hi March 16, 2024 zan khan in lama a haw loh avangin a chhungten an zawng a. A tukah a pasalin Aizawl Police Station-ah FIR a thehlut a, hemi ni vek chawhma dar 10 vel khan a fapain Aizawl New Market-a an dawr chhunga a nu ruang hi a hmu ta a. Hemi ni vek tlai lam khan Aizawl Police-te chuan a tualthattua puh Irene Lallawmzuali hi an man ta a ni.