Aizawl: Sorkar laipui scheme PM-RKVY-DPR 2025-2026 hnuaia sapthei (passion fruit) chin hawnna hun Ningani khan Hliappui Auditorium-ah hman a ni a. He hun hi Commerce & Industries Minister F. Rodingliana chuan khuallian niin a hmanpui a, hamthatna dawngtute hnenah tanpuina a sem chhuak nghal.
Khuallian F. Rodingliana chuan, sorkar laipui scheme tha tak hnuaia Hliappui leh Pawlrangah te sapthei chin kalpui a ni thei tur chu lawmawm a tih thu a sawi a, sorkarin kuthnathawktute tan an thlai thar hralhna tur market a siamsak chu vanneihthlak a tih thu a sawi.
Minister chuan kuthnathawktute chu hma lam pana pen zel turin a fuih a, “A thlawna pawisa dawn rilru paih a hun tawh a, tuna in pawisa dawn te hi in dinchhuahna tura sorkarin tanpuina sumfai a pek lawkna che u a ni,” a ti a. Sumfai dawnte chu a hmanna tur lova hman a nih chuan eirukna a nih thu sawiin, mahni pawimawhna zawn theuhah theihtawp chhuah turin a chah a ni.
He scheme hnuaiah hian Hliappuiah hamthatna dawngtu mi 51 leh Pawlrangah mi 39 an awm a, tanpuina sumfai bakah hmanrua leh damdawi hrang hrang sem tel a ni.