Aizawl: Mizoram Assembly Speaker Lalbiakzama’n ram politics kalphung ngun taka zir turin Mizo thalaite chah.
Ningani khan Young Indians Mizoram buatsaih ‘Young Indians Parliament, 2026’ neih a ni a. He hunah hian Assembly Speaker Lalbiakzama chu khuallian niin a hmanpui a, ex-MP Vanlalzawma chu khualzahawm a ni.
Khuallian Lalbiakzama chuan, politics khawvelah India leh Mizoram-ah kum naupangten hmun an chang tlem hle tih sawiin, thalaite chu politics ngaihven lo anga sawi an nih fo chhan chu a chhunga tel an tum loh leh an zirchian taima tawk loh vang a nih thu a sawi a. Vote thlak kawngah pawh mahnia ngaihtuahna siam lova chhungkaw thutlukna anga vote tawp mai chu thil pawi tak a nih thu a sawi.
Speaker chuan ram hruaitu thlanna hi mi lar emaw, mi fel ber emaw thlanna a nih loh thu sawiin, “Tu hian nge tuna kan dinhmun aia tha zawkah min hlangkai thei ang?” tiin thalaite hian ram dinhmun leh politics kalphung hi ngun taka an zir peih a hun tawh tih a sawi a. Rilru huaisen pu-a penchhuak ngam tur leh social media-a thu belhchian dawllo hmanga inbeihna dawihzepthlak takte sim a hun tawh thu sawiin, insawichhe tawn lo va issue khela debate leh policy-te sawiho zawk thin turin a chah.
Tuna politics huanga lut thalai zawkte hian kum upa zawkte aiin ram hruaina kawngah an hnufum lo tih lantir se, chu chuan thalai tha leh fel dangte ram rawngbawl duhna thinlung a siamsak ngei ang, a ti bawk.
Inkhawmah hian Mizoram Legislative Assembly official-ten Parliamentary Procedures leh inkaihhruaina dan chi hrang hrang sawifiahin, House-a sorkar siam dan kalphung te, discussion leh Bill drafting briefing-te an nei a, kalkhawmte hian Assembly House an tlawh nghal bawk.