Aizawl: Gauhati High Court chuan Parking House Support Scheme (PAHOSS) hnuaia parking sak nana sum pek chhuahte chu dik taka hman a ni em tih chungchanga Suo moto case a lo file tawh chu July 15, 2026 khian a ngaihtuah dawn.
High court hian kumin January 26 khan Mizoram sorkar chu PAHOSS hnuaia tanpuina sum pek chhuah zat te, tanpuina dawngtute hming, tanpuina sum hmanga in sak an hman zui dan leh thil pawimawh dangte chu affidavit hmanga thehlut turin a lo hriattir tawh a ni.
High court-in Suo moto a case a file-naah hian thil pawimawh zual hrang hrang a chhui mek a. |anpuina dawngtu zawng zawngten scheme duan dan angin parking area-te chu an hmang chhunzawm zel em tih finfiahna, sorkar leh a dawngtu inkara inremna thuthlung siam enfiahna report, leh scheme duan anga hmang lote pawisa lakletsak dan tur guideline siam tura High Court-in direction a lo pek tawhte an ni.
PAHOSS Scheme hi Aizawl khawpui traffic jam tiziaawm tura hmalakna niin, MNF sorkar hmasa flagship programme a ni a. February 6, 2019 khan hetih laia chief minister, Zoramthanga’n a lo tlangzarh tawh a ni.
June 13, 2019 khan a thawh khatna atan parking house sa tur mi 99 hnenah tanpuina Rs nuai 1,746 sem a ni a. Sorkar khan kum 2018-19 budget-ah he scheme atan hian Rs nuai 1,000 a dah a, kum 2019-20 budget-ah Rs nuai 6,000 a dah leh bawk.
Record-a a lan danin, PAHOSS atan hian Rs nuai 1,136.4 pek chhuah a ni tawh a. Sum pek chhuah tawh atanga chhutin, Aizawl khaw chhunga house parking-ah hian Light Motor Vehicle (LMV) 4,764 leh Two Wheeler 8,994, a vaiin lirthei 13,758 lenna hmun siam hman tura chhut a ni.