Aizawl: Commerce & Industries Minister F. Rodingliana chuan industrial area huam chhunga dik lo taka ram neite chungah sorkarin khauh takin hma a la dawn tih a sawi.
C&I Minister F. Rodingliana hian Zirtawpni tlai khan Industry hrang hrang – Plastic Tanky Industry, Handloom Industry, water bottling plant, toughened glass siamna leh Tin Roof industry te a tlawha, Mizoram Industries Owner’s Association (MIOA) hruaitute nen an inkawm bawk.
MIOA hruaitute chuan an harsatna tawh hrang hrangte Minister hnenah an thlen a. Mizoram chhunga entrepreneur-ten industry dinna tur ram an hmuh zawh tawh loh thu leh, industrial area awmsate pawh ram encroacher (ram la rute) ten an tihbuai avangin harsatna nasa tak an tawh thu an sawi a. He hna daltu avang hian central scheme an claim-na thlengin a bahlah phah nia sawiin, sorkar chu chinfelsak turin an ngen.
MIOA hruaitute ngenna chhangin Minister F. Rodingliana chuan, industrialist-te harsatna chu sorkarin theihtawp chhuahin a ngaihtuah mek tih a sawi a. Industrial area huam chhunga dik lo taka ram neite chungah sorkarin khauh takin hma a la dawn tih sawiin Minister chuan, “State tan industry hmasawnna a pawimawh tih sorkarin a hria a, entrepreneur leh industry-te tan environment tha siam turin theihtawp kan chhuah reng a ni,” a ti.
Zuangtuia Industrial Estate-ah hian Plastic Tanky industry pahnih, Tin rooftop industry-te, handloom industry 30 chuang leh industry dang lian tak tak an awm a ni. Heng industry-te hi minister hian tlawhin an hnathawhte a endik nghal a ni.