Aizawl: Sam tla thinte harsatna su kiang turin Inrinni khan JL Building, Tuikual South-ah LBS NewLife Clinic hawn a ni a, hemi kawnga thiamna bik nei doctor leh nurse-ten khawl hmangin hna an thawk dawn a ni.
Mizoram Health Department Principal Director hlui, Dr Lalrinliana Sailo chuan ribbon chet chatin a hawng a, “Mizoramah hetiang clinic hi a la awm ngai lo a, hair transplant clinic hmasa ber hawn a ni thei hi thil lawmawm em em a ni,” a ti a. Ram mipui rawngbawlna leh a mamawhte tan thil tangkai a nih theih nan duhsakna a hlan nghal bawk.
Mizo zinga orthopedics specilist hmasa ber Dr. Rinliana fanu, Dr. Lalnunpari Sailo chuan LBS NewLife Clinic hi a enkawl dawn a. Dr. Pari hi skin specialist (MD – Dermatology, Venereology, Leprosy) niin sam phun (hair transplant) lama thiamna bik nei a ni a, training chhuak hair technician pahnihin puiin thiamna bik nei mi dangte nen an vaiin hnathawk mi pariatin an vil dawn a, thiamna, khawl mamawh leh thil dangah a tha thei ang berin enkawl a tum tih an sawi.
Sam phun turin Mizorama chengte tan state dang pan a ngai thin a, he harsatna hi sut kian a nih theih nan operation theatre changtlung tak bunin sam phunna mai bakah hriselna kaihhnawih thil dang – physiotherapy, ultrasound, X-ray, endoscopy leh thisen lakna laboratory an bun tel nghal bawk.
Aizawl lailia mi mal damdawi in hriat hlawh tak ni thin Dr. Rinliana din NewLife chawi nun thar lehna a nih thu Dr. Pari chuan a sawi.
Mizorama sam phunna clinic hmasa ber hi hawn a nih hmain mi 20 chuangin an hau lawk a, Aizawl laili Vanapa Hall bul hnaiah awmin zing dar 9:30 atanga tlai dar 5:30 thleng dawr theih an ni dawn a, a duh tan mobile number 9863513858 / 9862172037-ah zawh chian theih a ni.