Chief Minister Lalduhoma chuan Thawhlehni khan a bial, Serchhip tlawhin rualbanlo leh kum upate tana hmanrua semna a telpui bakah hmasawnna project pawimawh tak tak a hawng.
Chief minister hian Serchhip DC leh Artificial Limbs Manufacturing Corporation of India (ALIMCO) tangkawp hmalaknaa rualbanlo mi 28 leh kum upa mi 183, a vaiin mi 211 hnenah Rs vbc 19.25 hlu hmanraw chi hrang hrang 1,427 a hlan.
CM chuan ALIMCO hmalakna chu fakawm a tih thu sawiin Mizoram pumah DC zawng zawngten lo ngaihven zui se a duh thu a sawi.
Chief minister hian DC Meeting Hall-ah Deputy Commissioner leh NIC-te siam ‘Serchhip District Plan & Project Monitoring System’ thar a tlangzarh bawk a. He system hian sorkar department hrang hrang hmalakna inthuah palh lakah sum leh hun a humhim dawn tih a sawi.
He hunah hian CM chuan sorkar hnathawh tihawlsam nan Mizoram hi digital state-a siam a duh thu leh department zawng zawngte digital platform-a lut turin a hrilh.
Bawngchawm tlanga International Paragliding thlawh chhuahna hmun panna kawngpui (4.70 km) leh Mat kam Zawlpui leh a chhehvel zau hrang hrang panna kawngpui (11.20 km) a hawng zui a. He hna hi NABARD sum hmanga Evergreen Construction & Consultancy thawh a ni a, a hun tiam aia kum khat zeta hma a an zawh avangin PWD-in ‘Letter of Appreciation’ an hlan hial a ni.
Heti hian zau hrang hrang 83.03 hectare a zau hmasawnna tura siam a ni bawk.
Tlai lamah Chief Minister hian Serchhip Sports Complex-ah Serchhip MLA Cup 2026 kharna a hmanpui a. Infiamna hi thalaite tana eizawnna leh ruihhlo laka invenna tha tak a nih thu sawiin, bial chhunga VC team 23 tel zawng zawngte a chawimawina a hlan bawk.